خوش خصال و خوش خیال و خوش خبر، خیرالبشرﷺ
حفیظ تائب کا مختصر تعارف :
حفیظ تائب (1931-2004) کا اصل نام عبدالحفیظ تھا۔ آپ عصرِ حاضر میں اردو اور پنجابی نعت گوئی کا ایک نہایت معتبر اور بلند پایہ نام ہیں۔ آپ کو “مجددِ نعت” بھی کہا جاتا ہے کیونکہ آپ نے نعت کو روایتی مبالغہ آرائی سے نکال کر قرآن و سنت کے ٹھوس حقائق، علمی وقار اور ادبی چاشنی سے روشناس کرایا۔ آپ کی نعت گوئی میں محبتِ رسول ﷺ کے ساتھ ساتھ امتِ مسلمہ کی زبوں حالی کا درد اور اصلاح کا پہلو بھی نمایاں ہے۔ آپ کے شعری مجموعوں میں ‘صلو علیہ وآلہ’، ‘سک مترایاں دی’ اور ‘تعبیر’ کو بے حد مقبولیت حاصل ہوئی۔ حکومتِ پاکستان نے آپ کی ادبی خدمات کے اعتراف میں آپ کو ‘تمغہ امتیاز’ اور ‘صدارتی اقبال ایوارڈ’ سے بھی نوازا۔
حفیظ تائب کے بارے میں مزید تفصیل سے پڑھنے کے لیے اس لنک کو ملاحظہ فرمائیں ۔
https://urli.info/1s2xV
مکمل نظم :
خوش خصال و خوش خیال و خوش خبر، خیرالبشرﷺ
خوش نژاد و خوش نہاد و خوش نظر، خیرالبشرﷺ
دل نواز و دل پذیر و دل نشین و دل کشا
چارہ ساز و چارہ کار و چارہ گر، خیرالبشرﷺ
سر بہ سر مہر و مروت، سر بہ سر صدق و صفا
سر بہ سر لطف و عنایت، سر بہ سر خیرالبشرﷺ
صاحبِ خلقِ عظیم و صاحبِ لطفِ عمیم
صاحبِ حق، صاحبِ شق القمر، خیرالبشرﷺ
کارزارِ دہر میں وجہِ ظفر، وجہِ سکوں
عرصۂ محشر میں وجہِ درگزر، خیرالبشرﷺ
رونما کب ہوگا راہِ زیست پر منزل کا چاند
ختم کب ہوگا اندھیروں کا سفر، خیرالبشرﷺ
کب ملے گا ملتِ بیضا کو پھر اوجِ کمال
کب شبِ حالات کی ہوگی سحر، خیرالبشرﷺ
در پہ پہنچے کس طرح وہ بےنوا، بے بال و پر
اک نظر تائب کے حالِ زار پر، خیرالبشرﷺ